21/10/2015 | KULTURO » La ministro pri edukado en Ganao lastatempe anoncis, ke oni baldaŭ forigos la anglan kiel la instrulingvon en lernejoj. Laŭ novaĵraporto anglalingva, la ministro, P-ino Jane Naana Opoku-Agyemang, plejparte kulpigas la lernejan instrulingvon por la nekapablo de la edukitaj klasoj evoluigi la nacion. "Kiam ni forigos [la anglan kiel la instrulingvon] ni ŝanĝos la landon", ŝi deklaris.Komparante la eduksistemojn de Sud-Koreio kaj Ganao, ŝi rimarkis, ke "ĉar la koreoj estis instruitaj en lingvo kiun ili komprenis, la edukado progresis; ĉar ni instruas niajn infanojn en lingvo kiun ili eĉ ne komprenas, ni malhelpas ilin".
La ministro ŝajne diris nenion pri la lingvo(j) kiu(j) anstataŭigos la anglan. La datumbazo Ethnologue listigas 81 lingvojn por Ganao. La angla estas la oficiala lingvo. La ĉefa laborlingvo en la lando estas la akana.