29/07/2015 | ESPERANTO » Memore al la apero de la "Unua Libro" la 26-an de julio 1887, pasintdimanĉe oni festis la naskiĝtagon de Esperanto kiel la Esperanto-Tagon."Unua Libro" estas konvencia nomo de l' unua lernolibro de Lingvo Internacia, nuntempe nomata Esperanto. Ĝin verkis L.L. Zamenhof sub la kaŝnomo D-ro Esperanto. La libro havas la indikon, ke l' cara cenzuro aprobis ĝin la 21-an de majo 1887. La dua aprobo de l' rusa cenzuro kun la permeso de disvastigo post la presado, portas la daton de la 26-a de julio; tiun daton oni ĝenerale konsideras kiel aperdaton. Ĝi estas festata kiel naskiĝtago de Esperanto.
La originala nomo de l' verko, en la rusa lingvo, estas "Международный языкъ. Предисловіе и полный учебникъ." ("Internacia lingvo. Antaŭparolo kaj plena lernolibro."), sed en priskriboj de l' historio de Esperanto oni kutime nomas ĝin "Unua Libro". Al la naskiĝo de tiu kromnomo certe kontribuis posta verko efektive titolita "Dua Libro de l' Lingvo Internacia" (1888). Oni uzas la nomon "Unua Libro" por ĉiuj lingvoversioj kaj ĉiuj eldonoj de l' verko.