23/11/2015 | MONDO » La 22-an de novembro, laŭ rezulto de l' dua-raŭnda voĉdonado de l' tiulanda elektado, Mauricio Macri (Cambiemos) akiris 51,4% da voĉoj, dum lia rivalo Daniel Scioli (Frente para la Victoria) 48,6%. Tiamaniere, la nuna urbestro de Bonaero iĝos prezidento de Argentino ekde la venonta 10-a de decembro.Macri naskiĝis en Tandilo la 8-an de februaro 1959. Filo de l' itala magnato Francesco Macri, li diplomiĝis kiel civila inĝeniero ĉe l' Katolika Universitato de Argentino. En 1985, li ĉeestis ankaŭ mallongajn kursojn ĉe Columbia Business School, Wharton Business School kaj la loka Universitato CEMA.
En 1992 li iĝis la vicprezidanto de Sevel (tiama licencita fabrikanto de aŭtomobiloj Fiat kaj Peugeot en Argentino, kaj parto de liapatra holdingo, la Grupo Socma), grimpante al la prezidanteco en 1994.
Li estis dum 12 jaroj (1995-2007) la prezidanto de l' sportklubo Boca Juniors.
En 2003 li fondis la partion Compromiso para el Cambio (kiu en 2005 aliĝis al alianco PRO, kiu ekde 2015 aliĝis al koalicio Cambiemos). Li estis ŝtata deputito por la urbo Bonaero inter 2005 kaj 2007. Ekde 2007 li estas urbestro de Bonaero, posteno por kiu li estas reelektita en 2011.
La jaron 2014, Macri estis Alta Protektanto de l' 99-a Universala Kongreso de Esperanto.